Bakı. Nicat Mustafayev – APA-Economics. Ötən il ərzində Azərbaycanda neft məhsullarının istehsalı sahəsində 1 345,6 mln. manatlıq məhsul istehsal olunub.

Dövlət Statistika Komitəsindən «APA-Economics»ə verilən məlumata görə, il ərzində 1 237,7 min ton avtomobil benzini, 609,6 min ton ağ neft, 2 366,5 min ton dizel yanacağı istehsal edilib. Avtomobil yollarının çəkilişi üçün mühüm əhəmiyyətə malik olan neft bitumunun istehsalı 2009-cu ildə 7,2% artıb və 236,2 min ton təşkil edib. Neft emalı müəssisələrinin anbarlarında 48 mln. manatlıq və ya ölkə sənayesi üzrə olan hazır məhsul ehtiyatının 20,7%-i qədər hazır məhsul olub.

Bununla yanaşı, 2010-cu il yanvarın 1-i vəziyyətinə əsas istehlakçılarda 1,5 min ton və ya əvvəlki ilin müvafiq dövrünə nisbətən 15,4% çox sürtgü yağları, 1,7 min ton və ya 6,2% çox maye qazlar, 4,5 min ton və ya 21,6% çox neft bitumu, 9,5 min ton və ya 26,7% çox daş kömür, 17,1 min ton və ya 22,1% çox avtomobil benzini, 18,6 min ton və ya 39,9% çox dizel yanacağı, 340,9 min ton və ya 4,4% az mazut yanacağı ehtiyatları olub.